Di vinars ai 27 fin a domenie ai 29 di Setembar 2024 al PAFF! International Museum of Comic Art di Pordenon si davuelzarà la 27esime edizion de Hobbiton, la fieste pai amants de Tiere di Mieç, inmaneade de Societât Tolkieniane Taliane.

Ancje i zovins di Aulùs a saran presints ae Hobbiton 2024, cuntun bancut la che a si podaran cognossi lis ativitâts de associazion e metisi dacuardi par seradis tolkienianis.

Ma la sorprese e je che ae Hobbiton si podarà provâ a dopleâ “Il Signôr dai Anei” graciis al laboratori de Aulùs: si podarà duncje dâ la vôs a Aragorn o a Frodo, a Gimli o a Galadriel, a Gandalf o a Legolas. Dut, clâr, in marilenghe. Il laboratori al si tignarà sabide, des 2 aes 5 dopo di misdì, e domenie des 10.30 aes 12.30.

Il laboratori al è a gratis e al dure 20 minûts par dopleadure. Al sarà pussibil domandâ il filmât dal tocut di cine dopleât, a gratis. Cui che al à voie, dut câs, al podarà judâ la Aulùs APS cuntune ufierte o cul tesserament.