Tolkien par Furlan... te capitâl de Piçule Patrie. Al rive a Udin «Tolkien tal Friûl», l’incuintri culturâl in marilenghe che Aulùs APS a propon par cognossi le opare leterarie di Tolkien in maniere vivarôse, simpatiche… e, juste ben, par Furlan. L’incuintri al sarà vinars ai 19 di Mai, aes 5 sot sere, te prestigjôse curnîs dal Salon dal Popul di Palaç D’Aronc, storic municipi di Udin. L’event al è inserît tal program de Setemane de Culture Furlane, inmaneade ogni an de bande de Societât Filologjiche Furlane.

La jentrade e je libare fin che al è puest.

In plui des leturis cjoltis des oparis - cualchidune pôc cognossude - di Tolkien no mancjarà cualchi peraule sui progjets che, za di timp, a viodin i zovins de Aulùs impegnâts tal promovi tal stes timp la opare dal professôr di Oxford – che tant al amave lis lenghis – e la nestre lenghe, chê furlane.

Tra lis leturis, ae serade al intervignarà il president de Aulùs APS, Francesco Spizzamiglio, plui cualchi soci de associazion. A moderâ la serade al sarà il gjornalist Giovanni Lesa, diretôr responsabil di Contee Furlane colaboradôr di Radio Spazio. Ae fin de serade a ducj i partecipants al sarà regalât un piçul gadget friul-tolkienian preparât de Aulùs APS.

Infin si butarà un voli ai prossims progjets, leâts in maniere particolâr al 50° aniversari de muart di John Ronald Reuel Tolkien (2 di Setembar 1973).

Locandine dal incuintri di Udin dal 19 di Mai 2023