Rivât ae tierce edizion, al partìs ai 10 di Setembar il concors di dissen «Il Signôr dai Anei di piturâ» come simpri il concors al è viert a partecipants di ogni etât, furlans e di fûr regjon.
Il teme di chest an, par festezâ ancjemò i 70 agns de publicazion de prime part da “Il Signôr dai Anei”, al è “La Compagnie dal Anel, i siei components, lis sôs aventuris”: insume, si pues lâ dai ritrats dai 9 membris de Compagnie, ai moments plui biei dai lor viaçs inte Tiere di Mieç.
Par ducj i detais al è pussibil butâ un voli al regolament dal concors. Ai partecipants a si domande ancje di compilâ un modul di iscrizion.
• Regolament dal concors (PDF)
Ce disial il regolament?
Ai partecipants a si domande di realizâ une lôr interpretazion di cualchi membri de Compagnie dal Anel o di cualchi moment che al viôt tant che protagonist un o plui di lôr. Un al pues ispirâsi, clâr, ai libris di Tolkien, ma ancje ae trilogjie di Peter Jackson. Par preparâ lis ilustrazions – e mandâlis ae Aulùs APS – al è timp dai 10 di Setembar fintremai ai 20 di Otubar dal 2024.
Po dopo dutis lis ilustrazions e vignaran publicadis su la pagjine Facebook e sul profîl Instagram “Il Signôr dai Anei”, par fâ scomençâ la sfide dai likes par viodi cui che al à di vinci. Pes votazions si varà timp dai 21 ai 28 di Otubar dal 2024.
Cuai sono i premis?
Libris, prodots di gastronomie furlane, gadgets furlans e tolkienians. Dut chest dividût tra doi premis. Lis categoriis, di fat, e saran “Friûl” e “Italie”, in base ae divignince dai artiscj.
E lis ilustrazions?
Ancje cui che nol vinçarâ al podarâ viodi il sô disen publicât su «Contee furlane» o sui profii social Il Signôr dai Anei, o ancjemò su cualchi altri gadget o publicazion de Aulùs APS tant che la seconde edizion dal “Lunari Tolkienian Furlan”. Finît il concors, di fat, lis ilustrazions a podaran vignî dopradis de Aulùs APS in mût libar, citant l’autôr.
Fonts de foto di viartidure: Sara Chiavon, «Mordor, un anello per due mondi», 2023
