Viodude la buine riesside de prime edizion, la associazion Aulùs e à decidût di lâ indenant cul concors di dissen «Il Signôr dai Anei di piturâ» : tant che l’an passât il concors al è viert a partecipants di ogni etât, furlans e di fûr regjon.
Il teme di chest an, viodût che tal 2024 a colin i 70 agns de publicazion da “Il Signôr dai Anei”, al è “Paisaçs de Tiere di Mieç”: de Contee a Minas Tirith, di Mordor a Bosc Scûr, cun dut ce che al è tal mieç – edificis e abitants.
Par ducj i detais al è ben butâ un voli al regolament dal concors. Ai partecipants al è ancje domandât di compilâ un modul di iscrizion.
Il concors al è supuartât de Societât Tolkieniane Taliane e de librerie "La Tarantola" di Udin.
• Regolament dal concors (PDF)
Cemût funzionial il concors di dissen?
Fasint une sintesi dal regolament, ai partecipants al ven domandât di realizâ une lôr interpretazion di cualchi paisaç, ambientazion, paîs de Tiere di Mieç. Un al pues ispirâsi, clâr, ai libris di Tolkien, ma ancje ae trilogjie di Peter Jackson o ae serie tv “I Anei dal podê”. Par preparâ lis ilustrazions – e mandâlis ae Aulùs APS – al è timp fintremai a da mercoledì 4 ottobre a venerdì 10 novembre 2023.
Po dopo dutis lis ilustrazions e vignaran publicadis su la pagjine Facebook e sul profîl Instagram “Il Signôr dai Anei”, par fâ scomençâ la sfide dai likes: dongje des votazions de jurie, di fat, e sarà la votazion “dal popul” (che, in câs di paritât, al contarà dopli). Pes votazions si varà timp dai 10 ai 19 di Novembar.
Ce si puedial vinci?
Libris e bogns par comprâ libris, prodots di gastronomie furlane e la clavute USB “Aulùs” (cuntune sorprese dentri). Dut chest dividût tra doi premis. Lis categoriis, di fat, e saran “Friûl” e “Italie”, in base ae divignince dai artiscj.
E lis ilustrazions?
Ancje cui che nol vinçarâ al podarâ viodi il sô disen publicât su «Contee furlane» o sui profii social Il Signôr dai Anei, o ancjemò su cualchi altri gadget o publicazion de Aulùs APS tant che la seconde edizion dal “Lunari Tolkienian Furlan”. Finît il concors, di fat, lis ilustrazions a podaran vignî dopradis de Aulùs APS in mût libar, citant l’autôr.
