Gnove serade di aprofondiment de opare tolkieniane, tal an che si ricuarde il 50° aniversari de muart di Tolkien. Apontament vinars ai 31 di Març, aes 8 e mieze di sere, inte vecje latarie di Tombe di Merêt, in place Dalmazie 1.
Rispiet ae “prime”, che je stade a Cjampfuarmit ai 23 di Zenâr, a Tombe o fevelarìn di temis diferents cun leturis gnovis. Dut, clâr, in marilenghe, cun jentrade libare fin che al è puest.
A proposit di furlan, no mancjarà cualchi peraule sui progjets che, za di timp, a viodin i zovins de Aulùs impegnâts tal promovi tal stes timp la opare dal professôr di Oxford – che tant al amave lis lenghis – e la nestre lenghe, chê furlane.
Tra lis leturis, ae serade al intervignarà il president de Aulùs APS, Francesco Spizzamiglio, plui cualchi soci de associazion. A moderâ la serade al sarà il gjornalist Giovanni Lesa, diretôr responsabil di Contee Furlane colaboradôr di Radio Spazio. Ae fin de serade a ducj i partecipants al sarà regalât un piçul gadget friul-tolkienian preparât de Aulùs APS.
Infin si butarà un voli ai prossims progjets, leâts in maniere particolâr al 50° aniversari de muart di John Ronald Reuel Tolkien (2 di Setembar 1973).
La serade e je realizade de Aulùs APS in colaborazion cu la Pro Loco Tombe di Merêt APS.
