Gnûf apontament di cognossince de opare leterarie di Tolkien, tal an che si ricuarde il 50° aniversari de muart dal autôr, ancje, dal "Signôr dai Anei". Apontament martars ai 18 di Avrîl, aes 8 e mieze di sere, inte biblioteche di Pagnà, in vie Zampis 3 a Plain. Organizade intal ambit des celebrazions pe Fieste de Patrie dal Friûl, che e je stade ai 3 di Avîl stât, la serade si davuelzarà dute in marilenghe, cun jentrade libare fin che al è puest.

A proposit di furlan, in plui des leturis cjoltis des oparis - cualchidune pôc cognossude - di Tolkien, no mancjarà cualchi peraule sui progjets che, za di timp, a viodin i zovins de Aulùs impegnâts tal promovi tal stes timp la opare dal professôr di Oxford – che tant al amave lis lenghis – e la nestre lenghe, chê furlane.

Tra lis leturis, ae serade al intervignarà il president de Aulùs APS, Francesco Spizzamiglio, plui cualchi soci de associazion. A moderâ la serade al sarà il gjornalist Giovanni Lesa, diretôr responsabil di Contee Furlane colaboradôr di Radio Spazio. Ae fin de serade a ducj i partecipants al sarà regalât un piçul gadget friul-tolkienian preparât de Aulùs APS.

Infin si butarà un voli ai prossims progjets, leâts in maniere particolâr al 50° aniversari de muart di John Ronald Reuel Tolkien (2 di Setembar 1973).

La serade e je realizade de Aulùs APS in colaborazion cul assessorât ae culture dal Comun di Pagnà, cul supuart dal progjet "Cultura Nuova" e cul contribût de ARLeF (Agjenzie Regjonâl pe Lenghe Furlane) in cualitât di event colaterâl ae Fieste de Patrie dal Friûl 2023.

• Locandine de serade a Pagnà (JPG)