Frodo e Sam, intal dissen “Mellon” di Maria Fabbro, a dominin la cuviarte de edizion 2025 di “Contee furlane”, la publicazion anuâl de Aulùs Aps. Sedis pagjinis, dutis a colôrs e, in maniere rigorose, dutis scritis sedi par Talian che par Furlan, par un numar – il cuart – une vore siôr di articui e ilustrazions.

“Contee furlane” e ven distribuide dibant ai socis de associazion. Cun di plui e ven dade fûr intai apontaments che a viodin protagoniste Aulùs Aps: proiezions di cine, seradis di culture tolkieniane, fieris e adunancis.

Une cerce dai articui

Prime di dut “Contee furlane” 2025 e conte la vite associative de Aulùs Aps intal 2024 (un an plen di apontaments che, come che al à scrit il president Francesco Spizzamiglio intal editoriâl di cuviarte, al è stât un timp sedi di semence che di racuelte). Po dopo, “Contee furlane” e presente articui di grant valôr, tacant cu la straordenarie interviste a Davide Perino, la vôs di Frodo Baggins inte trilogjie di cine di Peter Jackson (e intun bielissim “curt” dopleât par Furlan). Intal an che al à viodût jessi in librerie une gnove edizion da “Lo Hobbit”, il boletin al propon un aprofondiment di Caterina Ciuferri su la origjine dal non “hobbit” inte gjenesi linguistiche tolkieniane. Ciuferri e je Comendadore e Ufficiâl dal Ordin al Merit de Repubbliche Taliane, plui che tradutore dal libri.

Un salt inte lenghe Furlane cui voi di cui che al à studiât la sô diffusion sul territori: al è l’articul di Giovanni Lesa, diretôr responsabil di “Contee furlane”, intun test dulà che a vegnin fûr cetancj elements di interes su cemût che la lenghe Furlane e ven doprade. Intal stes ambit l’articul di Massimiliano Ghiro, vicepresident de Pro Loco di Teôr, su la “adunance dai furlans” davuelte propit intal centri de Basse furlane.

No mancjin lis firmis di cetancj altris components de Aulùs Aps: dal vicepresident Emanuele Paravano al segretari Luca Baradel, dal afezionâtissim soci Christian Romanini ai amîs – e aromai “partner” di cualchi piçul progjetut – di Spoken Carnia.