Si clame «Contee furlane: Tolkien tal Friûl» e e je une gnove trasmission (podcast) che Aulùs APS – in colaborazion cun Radio Spazio – e mandarà in onde ogni setemane par radio e su internet. Par Furlan.
La prime pontade e larà in onde miercus ai 11 di Zenâr 2023, aes 4 dopodimisdì e in repliche aes 9 sot sere su lis frecuencis di Radio Spazio. Une altre repliche e sarà trasmetude la sabide aes 7 sot sere.
Intes pontadis diviersis vôs e infondiran la figure di Tolkien in maniere legre e simpatiche, ma cence dismenteâ il just rigôr. Dut chest intal an dal cincuantesim de muart di Tolkien, che e je stade ai 2 di Setembar dal 1973.
Inte trasmission si cjacararà de tormentade vite dal professôr-scritôr di Oxford, des sôs oparis (no dome “Il Signôr dai Anei”), ma ancje di argoments simpri presints, che si pandin dai siei libris e de sô vite: la amicizie, l’amôr, la passion pes lenghis e la nature, la ricercje dal ben comun e vie indenant.
In plui che su Radio Spazio, ogni pontade e sarà a disposizion a gratis su Spotify, Apple podcast e altris plateformis di podcasting (Overcast, Pocket Casts, SoundCloud), su chest sît e su chel di Radio Spazio.
Dut chest lavôr al è pussibil graciis ae opare volontarie di diviers socis de Aulùs APS e al supuart di cui – socis o dome donadôrs – che al rint pussibil sostignî lis spesis par chest e i altris progjets de associazion.
