Daspò Varian, Pordenon, Udin e Reane, “Il Signôr dai Anei” par Furlan al rive ancje a Maian. Intal ambit dal progjet Me.Te dal Comun mananês, il cine de “La Compagnie dal Anel” dopleât in marilenghe al sarà proietât vinars ai 21 di Fevrâr aes 20.30 intal auditorium comunâl di Maian, in vie Zorutti 14.

L’ingres al sarà libar e dibant, prenotant però il puest scrivint une e-mail al Informezovins di Maian (informajano@comune.majano.ud.it) o clamant il numar 0432 948455.

In plui, partecipant ae serade al sarà pussibil ricevi in regâl l’edizion 2025 dal boletin “Contee furlane”, frescje di stampe, publicade ogni an de bande de Aulùs Aps. Si podarâ ancje cognossi la associazion che di cinc agns in ca e cjacare atôr pal Friûl des oparis di Tolkien, cu la carateristiche proprie di doprâ la lenghe Furlane.