Ae fin des votazions in linee, ven a stâi ae miezegnot di domenie ai 27 di Novembar, o fasìn savê i vincidôrs dal concors “Il Signôr dai Anei di piturâ”.

Categorie “Friûl”

Tra i nûf partecipants, i vincidôrs a son:

• Premi social: Sara Chiavon di Tavagnà (UD), cu la ilustrazion "Un anello per due mondi", che metint dongje i vôts di Instagram e Facebook a à cjapât ben 204 ponts. Il premi al è une ceste di prodots gastronomics furlans e cualchi gadgets de Aulùs APS, comprendude la clavute Aulùs cul cine "La Compagnie dal Anel” dopleât par furlan.
• Premi de jurie: Francesca Pegorer di San Vît al Tiliment (PN), cun la ilustrazion "Sulle tracce degli hobbit (il riposo del re)". Chest premi al consist in un bon di 30 € di spindi inte librarie Tarantola Ubik di Udin, plui cualchi gadgets de Aulùs APS (cine comprendût).

Categorie “Italie”

Sîs i partecipants al concors pe categorie “Italie”, di diviersis regjons talianis. A àn vinçût:

• Premi social: Nahuel Lo Stracco di Lecco, vincidôr cu la ilustrazion "Lord Sauron". Ben 413 i ponts otignûts zontant lis reazions su Instagram a chês su Facebook. Chest premi al consist in cualchi libri “tolkienian”, cualchi libri sul Friûl e un prodot artesanâl furlan dedicât a “Il Signôr dai Anei”, plui cualchi gadget Aulùs APS.
• Premi de jurie: Pasquale Brusco di Sant’Agapito (IS) cu la ilustrazion "Fiamma di Anor". Al vinç cualchi libri “tolkienian”, cualchi libri sul Friûl e gadget Aulùs APS.

Ringraciaments

Lassant stâ i premis, un ringraciament speciâl al va a ducj i cuindis artiscj che a àn partecipât a chest concors: in ognidune des ilustrazions si pues viodi la passion sclete pe opare di Tolkien, tant al è vêr che o vin decidût di fâ un lunari tolkienian cu la plui part di chescj lavôrs maraveôs.

O ringraciìn la jurie, ven a stâi: Paolo Paron (president onorari de Societât Tolkieniane Taliane), Giovanni Lesa (Diretôr responsabil di Contee Furlane), Manuel Scapinello (ilustradôr), Alessandra Valenti (ritratiste) e Emanuele Paravano (vicepresident de associazion Aulùs).

O ringraciìn ancje laARLeF, Agjenzie Regjonâl pe Lenghe Furlane, par il patrocini al concors, e la Societât Tolkieniane Taliane (Società Tolkieniana Italiana) pal sô supuart.

Graciis ancje a dutis lis realtâts che a àn sostignût i premis de sfide: la librerie Tarantola di Udin, la gastronomie "Di tutto un po'" di Katia Zuccato (Varian, UD), la latarie "Della Savia" (Basilian, UD), l’Aziende agricule Colli di Poianiz (Prepot, UD).